Pre-papatua nago

Hona Iñaki Gurrutxagak aitatasunaren inguruan idatzitako bertso-sorta.

-1-

Ailegatu zait txanda,

egin dut plenoa:

ez da prezisamente

txosnako turnoa.

Badatorkit etxeko

festa intimoa

edaririk gabeko

gaupasa sanoa:

abendurako aita

izatera noa.

-2-

Gaztetasunak badu

berez nahiko pisu

goizegi ez ote den

ziur ez dakizu...

gazte zarelakoan

zabiltza beti zu

baina gero zalantzak

etortzen zaizkizu

amak “bazen garaia!”

esaten badizu.

-3-

“Joder, ona!”, “Pozten nauk!”

“Gezurretan zabiltz!”

mila erreakzio

ta hamar mila hitz

“ederra datorkizu!”

Hor, denak bat, aldiz:

hurrena pentsatuko

nuke zazpi aldiz

konbentzimentu osoz

egina ez balitz.

-4-

“Haur bat ez da bi patxo

eta hiru sugus”

Aita on izan nahi ta

nahastu naiz helburuz,

aholkari-zerbitzuz

ta nahastu inguruz,

edozer galdetzeko

bizi naiz apuruz:

denek dakite dena

ta denari buruz.

-5-

Ginekologo finez,

sasi medikuez,

ariketa-fisiko

rekomendatuez...

ta bat hasi ezkero

haurraren kontuez

denak dira jakintsu,

denak, baina zu ez...

aholkari-taldea

bihurtu da juez!

-6-

“Betiko pardeletik

pasa trapuzkora!”

“Trapuzkoa? Serio?

Hau moda da, moda!”

Honek hau ta hark hura,

ta denak gustora:

ematen badiote

haurrari ahora

kontraesanetatik

elikatuko da.

-7-

Pre-papá erropetan

sartuta hor darrait

aholkuak entzuten

xuabe eta light,

baina entzun behar du

hainbeste epaimahaik

aurrera aterako

garela nolabait

trajea handiegi

geratzen ez bazait.

-8-

Baina hasi garenez

hala trajeatzen

ahalegindu beharko

da neurriak hartzen

orratz muturren xixta

errez da sendatzen,

aitatasun senera

ari naiz moldatzen

pentsa, hasia nago

asteka kontatzen!

-9-

Izena ipintzeko

ere zenbat trote!

Herri txiki batean

premizkoa ote?

Neska bada, polit bat

jarriko nioke;

mutila bada zertan

ahalegindu tope?

Guztiek abizenez

deituko diote.

-10-

Hitz berrienak ere

bere zera badu:

bateko “Maxi-coxi”

besteko “Booga-boo”...

Lehen xexto eta karro

zirenak, ondradu...

semantika berrian

lehengoak gara gu:

filologo karrera

alferrik daukagu.

-11-

Dena da nobedade,

sentipen tropela,

lehen ekografiaz

oroitu bestela,

pentsa nik xomorro bat

espero nuela,

baina haur bat zegoen

eskuaz, horrela,

guri agur egiten

balebil bezela.

-12-

Hauxe datorkigu ba

hemendik aurrera

ondo bete nahi nuke

aitatxo papera

besteei entzunez baina

neure arabera

eskua hurbiltzean

gauez sabelera

haurra ta biok ondo

entenitzen gera.